ബെംഗളൂരു: വർഷങ്ങൾക്ക് ശേഷം കർണാടക ലെജിസ്ലേറ്റീവ് കൗൺസിലിൽ (ഉപരിസഭ) ഭൂരിപക്ഷം കൈവരിച്ചതിന് പിന്നാലെ, മുൻ ബിജെപി സർക്കാർ നടപ്പിലാക്കിയ സമ്പൂർണ്ണ ഗോവധ നിരോധന നിയമം പുനഃപരിശോധിക്കാൻ ഭരണകക്ഷിയായ കോൺഗ്രസ് നീക്കം തുടങ്ങി. മുസ്ലിം സമുദായത്തിന്റെ പ്രധാന ആവശ്യങ്ങളിലൊന്നായ ഗോവധ നിരോധനം റദ്ദാക്കുന്നതിനായി പുതിയ ബിൽ കൊണ്ടുവരുന്നതിനെക്കുറിച്ച് കോൺഗ്രസ് ജനപ്രതിനിധികൾക്കിടയിൽ ചർച്ചകൾ ആരംഭിച്ചു കഴിഞ്ഞു.
ദാവൻഗരെ സൗത്ത് ഉപതിരഞ്ഞെടുപ്പിൽ മുസ്ലിം സ്ഥാനാർത്ഥിക്ക് സീറ്റ് നൽകാത്തതിനെ തുടർന്ന് സമുദായത്തിൽ നിന്നുണ്ടായ രാഷ്ട്രീയ തിരിച്ചടി പരിഹരിക്കാനുള്ള ശ്രമങ്ങളുടെ ഭാഗമായാണ് കോൺഗ്രസിന്റെ ഈ നീക്കമെന്നാണ് വിലയിരുത്തൽ. ഈ ഉപതിരഞ്ഞെടുപ്പ് ഫലം വന്ന് ദിവസങ്ങൾക്കകം തന്നെ, ക്ലാസ് മുറികളിൽ മുസ്ലിം പെൺകുട്ടികൾ ഹിജാബ് ധരിക്കുന്നതിന് 2022-ൽ ഏർപ്പെടുത്തിയ വിലക്ക് കോൺഗ്രസ് സർക്കാർ പിൻവലിച്ചിരുന്നു. ഇതിന് പിന്നാലെയാണ് ഗോവധ നിരോധന നിയമത്തിലും ഭേദഗതി വരുത്താൻ ഒരുങ്ങുന്നത്.
2020-ലാണ് മുൻപ് നിലവിലുണ്ടായിരുന്ന 1964-ലെ നിയമം മാറ്റി പകരം കടുത്ത വ്യവസ്ഥകളോടെയുള്ള ‘കർണാടക ഗോവധ നിരോധന-കന്നുകാലി സംരക്ഷണ നിയമം’ ബിജെപി സർക്കാർ കൊണ്ടുവന്നത്. പഴയ നിയമപ്രകാരം 12 വയസ്സിന് മുകളിൽ പ്രായമുള്ളതോ, പ്രജനന ശേഷി ഇല്ലാത്തതോ, പാൽ തരാത്തതോ ആയ കാളകളെയും പോത്തുകളെയും അറുക്കാൻ അനുമതിയുണ്ടായിരുന്നു. എന്നാൽ ബിജെപിയുടെ പുതിയ നിയമം പശുക്കളെ അറുക്കുന്നത് പൂർണ്ണമായി നിരോധിച്ചു. മാരകമായ രോഗബാധയുള്ള കന്നുകാലികളെയും, പ്രത്യേക അനുമതിയോടെ 13 വയസ്സിന് മുകളിലുള്ള പോത്തുകളെയും അറുക്കാൻ മാത്രമാണ് ഇതിൽ ഇളവുള്ളത്.
ഉപരിസഭയിൽ ഭൂരിപക്ഷമില്ലാതിരുന്നതിനാലാണ് മുൻപ് സിദ്ധരാമയ്യ സർക്കാരിന് ഈ നിയമം റദ്ദാക്കാൻ കഴിയാതെ പോയത്. കൂടാതെ ഹിന്ദു സന്യാസിമാരും നിയമം പിൻവലിക്കരുതെന്ന് മുഖ്യമന്ത്രിയോട് പരസ്യമായി ആവശ്യപ്പെട്ടിരുന്നു. എന്നാൽ പുതിയ സാഹചര്യത്തിൽ ബിജെപി തങ്ങളെ ‘ഹിന്ദു വിരുദ്ധർ’ എന്ന് മുദ്രകുത്താതിരിക്കാൻ ഇരുപക്ഷത്തിനും സ്വീകാര്യമായ ഒരു മധ്യമാർഗ്ഗമാണ് ആലോചിക്കുന്നതെന്ന് ഒരു കോൺഗ്രസ് എംഎൽഎ വ്യക്തമാക്കി. 1964-ലെ പഴയ നിയമത്തിലേക്ക് പൂർണ്ണമായി മടങ്ങാതെ തന്നെ സമ്പൂർണ്ണ നിരോധനം നീക്കാനാണ് പാർട്ടി ശ്രമിക്കുന്നത്.
ഉപരിസഭയിൽ കോൺഗ്രസിന് ഭൂരിപക്ഷമില്ലാതിരുന്ന ഘട്ടത്തിൽ ബിജെപി-ജെഡിഎസ് സഖ്യം പല സുപ്രധാന ബില്ലുകളും പരാജയപ്പെടുത്തിയിരുന്നു. വരുമാനമുള്ള ഹിന്ദു ക്ഷേത്രങ്ങളിലെ ഫണ്ടിന്റെ ഒരു പങ്ക് പൊതുപൂളിലേക്ക് മാറ്റാനുള്ള 2024-ലെ ബിൽ ഇത്തരത്തിൽ പരാജയപ്പെട്ട ഒന്നാണ്. ഗോവധ നിരോധനം റദ്ദാക്കുന്നതിനൊപ്പം തന്നെ, മുൻപ് കോൺഗ്രസ് തിരഞ്ഞെടുപ്പ് വാഗ്ദാനമായി നൽകിയ ‘മതസ്വാതന്ത്ര്യ സംരക്ഷണ നിയമം’ (മതപരിവർത്തന നിരോധന നിയമം) പിൻവലിക്കാനും നീക്കമുണ്ട്. ഈ നിയമം റദ്ദാക്കണമെന്ന് ക്രിസ്ത്യൻ സംഘടനകൾ ആവശ്യപ്പെടുന്നുണ്ട്. 2023 ജൂണിൽ കോൺഗ്രസ് മന്ത്രിസഭ ഈ നിയമം റദ്ദാക്കാൻ തീരുമാനിച്ചിരുന്നെങ്കിലും ഉപരിസഭയിലെ ഭൂരിപക്ഷമില്ലായ്മ കാരണം നിയമനിർമ്മാണം പൂർത്തിയാക്കാൻ കഴിഞ്ഞിരുന്നില്ല. ഉപരിസഭയിൽ ഭൂരിപക്ഷം ലഭിച്ചതോടെ ഈ നിയമങ്ങളും ഭേദഗതി ചെയ്യാനാണ് കോൺഗ്രസ് ലക്ഷ്യമിടുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
